АТАKА БАРА БУГАРСКИ ТЕРИТОРИИ ВО МАКЕДОНИЈА И ВО СРБИЈА, НО НЕ И ВО ГРЦИЈА
Струмица да ~ се врати на Бугарија ако Македонија сака да ја добие поддршката од Софија на патот кон евро-атлантските интеграции, побара вчера во бугарскиот парламент националистичката партија АТАKА.
Пратениците од АТАKА, која ја поддржува владејачката коалиција во Бугарија, изготвила декларација што ја поднесе во парламентот и со неа бара „териториите од бившата југословенска Република Македонија и од Србија населени со бугарско население, а ~ биле одземени со Нејскиот договор, да ~ бидат вратени во владение на Бугарија". Според партијата, Нејскиот мировен договор потпишан на вчерашен ден пред 94 години е неважечки, а со оглед дека тогаш на Бугарија ~ биле одземени т.н. западни покраини, тие сега мора да ~ бидат вратени на матичната држава. Но, во барањето и во декларацијата на партијата не се вклучени териториите што со договорот ~ биле одземени на Бугарија и биле припоени кон Грција.
Објаснувањето на АТАKА е дека Македонија тогаш не постоела како субјект, а Србија не е правен наследник на Kралството СХС, па затоа, што поскоро, овие делови од, како што велат, бугарската држава, треба да се вратат под софиска управа.
-Прашањето треба да биде решено пред Србија да стане членка на ЕУ и Македонија да ги почне преговорите - изјавил Адријан Асенов, пратеник на АТАKА.
Освен АТАKА, која е парламентарна партија и ја поддржува Владата на Орешарски, со сличен став е и вонпарламентарната ВМРО на Kаракачанов, кој вели дека посакува Македонија како дел од Бугарија да биде член на Европската Унија, што според него би било прекрасно, но, за жал, невозможно.
Инаку, ова не е првпат АТАKА да изнесува вакви барања. Лидерот на партијата Волен Сидеров пред две години ~ се закани на владејачката коалиција на ГЕРБ, на Бојко Борисов, дека ќе ја блокира границата меѓу Србија и Бугарија бидејќи биле запрени автобуси со негови приврзаници на границата со Србија.
АТАKА неколкупати досега барала поништување на Нејскиот договор, но безуспешно.
Нејскиот мировен договор е потпишан на 27 ноември 1919 година во Париз меѓу земјите од Антантата како победнички сојуз во Првата светска војна и поразената Бугарија. Меѓу земјите од Антантата било и Kралството на Србите, Хрватите и Словенците. Според договорот, Бугарија требало да предаде територии, најголем дел во западна Тракија, кои прво ~ припаднале на Антантата, а подоцна ~ биле предадени на Грција, како и територија околу Димитровград и Босилевград во Србија и Струмица во Македонија.
Освен територија, Бугарија требало да плати и репарации од 2,25 милијарди златни франци, односно 445 милиони долари, а на соседните земји требало да им предаде и стока, поради одземената стока во текот на војната. Бугарија исто така била обврзана да ги врати и архивите, уметничките и слични предмети што нејзината администрација ги одзела од другите земји.
Жана П. БОЖИНОВСКА
(Дневник)
28 ноември 2013