ПЕКОЛНО ВО НАСЕЛБАТА ЧЕНТО
ВТОРО УБИСТВО ВО ИСТА ЧАЈЏИЛНИЦА: И ПРЕД ТРИ ГОДИНИ ГО БАРАЛЕ ГАЗДАТА
Убиството што попладнево се случило во чајџилницата "Кај Џељо", каде според непотврдени информации е убиен газдата, а ранети се двајца, е второ убиство во последниве три години што се случило на истото место.
Во 2010 година беше убиено петнаесетгодишно момче, внук на сопственикот. И тогаш како и денеска убиството било извшено со автоматска пушка, но првиот пат беа тројца извршители, а вечерва најверојатно станува збор за еден напаѓач кој рафално стрелал во присутните.
Пред три години се зборуваше дека мета на нападот не било детето туку бил токму сопственикот, но за несреќа настрадал неговиот внук од Арачиново. Сопственикот е поврзан во неколку случаи на криминални пресметки па не се исклучува можноста да станува збор за одмазда.
Досега тој неколкупати бил мета на напади. Истата година кога се случи убиството на неговиот внук, во неговата куќа беше пукано со ракетен фрлач, а претходно експлодираа бомби под два негови автомобила, паркирани во дворот. Од МВР се уште нема потврда за идентитетот на жртвата.
(A.M.)
(Дневник)
29 декември 2013