-Споменикот на Филип Втори Македонски се наоѓа на истоимениот плоштад во населбата Автокоманда, во скопската општина Кисела Вода.
-Филип Втори Македонски (359-336 г. пр. н.е.) е македонски крал од династиjата Аргеади, син на кралот Аминта Трети. На 23-годишна возраст станал крал на Кралството Македонија. Се стекнал со слава на генијален стратег, храбар војсководец и одличен дипломат. Бил татко на Александар Македонски во бракот со Олимпија, како и на Филип Трети Аридеј во бракот со Филина од Лариса. Во негово време почнал периодот на големиот подем на македонската држава.
-Споменикот е висок пет метри и качен е на постамент, а до него се наоѓа фонтана околу која стојат човечки фигури, војници од фалангата. Постаментот е исполнет со релјефи на кои се прикажани Филип, Олимпија и Александар. Кралот Филип е претставен со превез на десното око, како последица на повреда што ја стекнал во битка.
-Бронзената фигура на Филип и на неговиот коњ е изработена во српската леарница „Јеремиќ". Автор на делата е Валентина Каранфилова-Стевановска.
