|
Ќе се плови ли од Дунав преку Македонија до Егејското Море?
СЕВЕРНИОТ СОСЕД ГО ТУРКА МЕГАПРОЕКТОТ
Српскиот министер за природни богатства, рударство и просторно планирање, Милан Бачевиќ, од вчера престојува во Кина, каде што со претставници на кинеските компании ќе разговара за изградба на пловен канал Белград - Солун, кој ќе минува низ Македонија. Српската новинска агенција „Танјуг" пренесе дека за време на неколкудневната посета, Бачевиќ ќе се сретне со претставници на власта и со компании што се заинтересирани за стратегиско партнерство или за соработка во изградбата на овој канал. Тој треба да договори и потпишување протокол со државната кинеска компанија „Чајна гезуба груп корпорејшн", врз чија основа потоа би била изработена студија за издржаност на овој проект.
Идејата е стара 100 години
Бачевиќ веќе најави дека Министерството ќе почне изработка на просторен план за овој проект.
- Просторниот план за проектот што ќе се вика пловен канал Белград - Солун треба да покрие површина од околу 10.500 квадратни километри, кој значително ќе ги промени економските, политичките, геостратегиските и геополитичките односи во Европа и истовремено ќе ги опфати граѓаните на територијата од Германија до Егејско Море - вели Бачевиќ.
Државниот секретар во Министерството за градежништво и урбанистичко планирање Миодраг Јоциќ завчера изјави дека изградбата на каналот многу ќе придонесе за развојот на земјата. Според Јоциќ, идејата е стара 100 години.
Тој укажа дека проектот ќе има огромна финансиска вредност имајќи предвид какви инженерски проблеми треба да бидат решени при реализацијата.
- Ќе треба да се направат низа порти, да се промени целата конфигурација на теренот каде што ќе минува каналот и да се поврзат реките Морава и Вардар - вели Јоциќ.
Македонија не е консултирана
И покрај тоа што српските власти ја актуализираат повторно темата за пловно поврзување преку Македонија со солунското пристаниште, тие сѐ уште немаат испратено никакви предлози до македонската влада.
- Владата секогаш е заинтересирана и расположена за соработка на економски проекти, вклучувајќи ги и оние што имаат поширок регионален карактер, особено во едни вакви инфраструктурни области со чија евентуална реализација, по природата на нештата, им се дава поддршка на економијата и на компаниите и се отвораат нови работни места. Досега немаме добиено конкретно барање за разгледување на оваа иницијатива, детали за неа, или пак напредна заокружена конструкција на идејата и придобивките и затоа не сме во можност и не е коректно да коментираме аспекти - изјави неодамна Александар Ѓорѓиев, портпарол на Владата на Република Македонија.
Тој истакна дека во моментот кога ќе им бидат доставени таква иницијатива или барање, тие ќе бидат сериозно разгледани и од Владата и од другите релевантни институции и бизнис-групации.
- Се разбира дека, доколку ни биде доставена разработена иницијатива, ние сериозно ќе ја разгледаме и ќе направиме анализи и пошироки консултации со експертите, бизнис-заедницата и коморите за околностите и за можностите, како и за целисходноста на нејзината реализација - вели Ѓорѓиев.
|
|