Од 5 до 7 јули 39. издание на фестивалот на народни инструменти и песни „Пеце Атанасовски" Меѓу богатата културна понуда на Прилеп ова лето се вбројува и фестивалот на народни инструменти и песни „Пеце Атанасовски", кој од 5 до 7 јули ќе се одржи 39. пат. Оваа манифестација е единствено место каде што се одржува традицијата и се негува изворниот македонски фолклор во нашата земја. Според најавите, на фестивалот ќе учествуваат над 200 учесници, а првпат годинава тој почнува во петок, а ќе заврши во недела.
Покровители се Министерството за култура и општината Прилеп.
- Свесни за она што го има направено Пеце Атанасовски за зачувувањето и презентирањето на фолклорното богатство во светот, како најзначајно културно наследство на земјата и оставено за сите генерации, му посветуваме големо внимание на фестивалот. Лани на Атанасовски му поставивме споменик, а в година јубилејот ќе се погрижиме достојно да го прославиме - вели градоначалникот Марјан Ристески.
И за директорката на фестивалот Весна Вучиќ, тој има специфична мисија.
- Оваа манифестација долги години овозможува не само презентирање на нашиот фолклор туку и размена на искуства, развивање пријателства и комуникација меѓу народите. За нејзината масовност говори фактот што во досегашните изданија учествувале над 9.000 инструменталисти - посочи Весна Вучиќ.
На свеченото отворање на фестивалот, кое почнува на петти јули во 20 часот на камената бина, му претходи промоцијата на книгата „Македонското традиционално пеење - хрестоматија со мелопоетска анализа" од авторката д-р Родна Величковска, издание поддржано од Министерството за култура.
Натпреварувачкиот дел ќе продолжи во саботата, од 20 часот, на летната сцена на плоштадот „Александрија", а од 11 часот годинава во спомен-куќата на виртуозот Пеце Атанасовски, во општината Долнени, ќе се одржи трибина на која ќе учествуваат еминентни етномузиколози што ќе дебатираат за формите и содржините на презентирањето на изворниот фолклор, а некои од учесниците ќе имаат и настап.
Фестивалот ќе заврши в недела, со доделување на наградите и посета на учесниците на манастирот „Св. Архангел Михаил" во Варош. | |
