РУСКИОТ РЕЖИСЕР КАРЕН ШАХНАЗАРОВ ВО СКОПЈЕ

Еден од најистакнатите руски режисери Карен Шахназаров од неделав вечер ќе гостува во Скопје, по повод ревијата на негови филмови што ја организира Филмскиот фонд на Македонија и руската амбасада во земјава. Прв филм што ќе биде прикажан е „Белиот тигар", кој беше руски кандидат за Оскар минатата година. Шахназаров е директор на продуцентската куќа „Мосфилм". Гостин од Русија е и режисерот Сергеј Симагин, кој соработувал на снимањето на филмот „Исчезнатата империја" (2008) на Шахназаров, а и одговорен за меѓународна промоција во „Мосфилм". 

Ревијата од 4 до 8 ноември ќе се прикажува и во 15 градови низ земјава, опремени со дигитални проектори. Ќе бидат прикажани неколку филмови од Шахназаров: „Палата бр.6", „Ние од џезот", „Отрови", „Град Зеро", „Љубов во СССР". 

Шахназаров (1952) е еден од најплодните руски режисери. Ги освоил големите руски филмски награди. За неговиот филм „Убиството на царот", Шахназаров бил номиниран во Кан во 1991 година. „Филмот „Ден на полната месечина" во Карлови Вари освои специјална награда од жирито, а „Американска ќерка" (1995) освои Гран-при во Шангај.