Излезе книга за соборните храмови во Македонија
Во издание на книгоиздателството „Матица македонска" излезе од печат колор-монографија „Соборните храмови во Македонија од времето на преродбата" од познатиот историчар на уметноста Димитар Ќорнаков
На страниците на ова дело од капитално значење за нашето културно богатство авторот пишува за духовните закрилници на македонскиот народ. Главен акцент е ставен на соборните храмови во Скопје, Велес, Куманово, Крива Паланка, Штип, Стар Дојран, Прилеп, Битола, Струга, Кичево, Лазарополе, како и на манастирскиот храм „Свети Јован Бигорски".
- Соборните храмови во Македонија од времето на преродбата заземаат значајно место во културната историја на Македонија. Тие се споменици на културата со извонредни историско-уметнички вредности, исполнети со богати содржини: архитектура, фрескоживопис, иконопис и резбарски дела. Во изминатите векови тие биле и останале светители на духовниот живот на македонскиот народ - пишува во воведот на делото.
Изданието е богато илустрирано со фотографии од графичките дизајнери Иван и Коста Калчеви.
Извор: "Нова Македонија"
|