„Ние не можеме да го градиме својот идентитет како Американци врз основа на вероисповедта, какво е нашето минато, затоа што дедо ми бил Германец, баба ми била од Данска, па што сум јас? Германец или Данец? Јас сум од третата генерација во Америка, моите родители, моите чичковци се родени во Америка и може да се нарекуваат Американци.
Вие, како жители на Македонија, треба да решите како ќе се дефинирате себеси и врз основа на кои вредности. Не можете да се дефинирате по својата националност, која е разновидна, ниту по верата, која исто така се разликува, или по културата, која е слична, но не е иста."
Пол Волерс, амбасадор на САД
Амбасадоре Волерс,
Со вашето предавање на Штуловиот универзитет во Тетово длабоко нè навредивте, нанесувајќи ѝ непроценливи штети на македонската држава и на македонскиот народ. Но во исто време, целосно ја демаскиравте американската политика на Балканот.
Ние, од движењето Македонски манифест, знаеме дека за еден службеник, чија работа е да ја претставува американската надворешна политика, ѓаволски е тешко себеси да се претстави како некој угледен светски професор кој држи визитинг предавања на разни универзитети, посебно ако тие предавања се поврзани со идентитетот на еден народ, кој, патем, е оспоруван од неговите соседи кои не му го дозволуваат основното човеково право - правото на самоидентификување. Сакаме само да ве прашаме „професоре" Волерс, дали докториравте кај грчкиот претседател Папуљас, кој исто како вас ни порача да се откажеме од македонизмот.
Исто така сакаме да ја разбиеме вашата идентитетска дилема и да ви посочиме дека сте во право кога велите дека не сте ниту Данец, ниту Германец, ама мораме да ви обрнеме внимание на фактот дека воопшто не изгледате ниту како Американец, оти како припадник на американската нација кој добил одговорна функција во друга држава, логично е да ја застапувате американската политика. Вие нам, всушност, идентитетски најмногу ни изгледате како Грк кој ја спроведува грчката геноцидна политика спрема Република Македонија и нејзиниот мнозински македонски народ, освен ако американската и грчката политика не се синхронизирале во намерата Македонците идентитетски да ги обезличат.
Амбасадоре Волерс, нам ни е совршено јасно дека е бескрајно тешко за еден човек идентитетски да се поврзува со народ што извршил геноцид на староседелците Индијанци. Свесни сме дека е срамно да се бараат своите корења кај оние што неколку века практикувале робовладетелство, третирајќи цела една раса како мајмуни. Убедени сме дека е речиси невозможно да создадеш симпатии за себе ако ѝ припаѓаш на нација што испробувала напалм-бомби врз жени и деца во Кореја и Виетнам. И, да не одиме подалеку. Треба да се срамите што, неодамна, нелегално ја бомбардиравте Србија, ама и за 2001-та, кога нам ни испративте терористи од Косово, според речникот што го користеше генералниот секретар на НАТО, Робертсон, за потоа да ги преквалификувате во „хуманитарци"...
Поради сето тоа, амбасадоре Волерс, крајно е невкусно на други народи да им се држат лекции за нивниот идентитет. Ние не сме ниту Данци, ниту Германци, ниту Американци. Со векови ние сме Македонци и носиме македонски национален идентитет. Ако веќе намерата е да бидеме игнорирани како народ, тогаш барем треба да се прочитаат изданијата на американските весници од почетокот на 20 век за да се дознае дека и американската нација била свесна за нашето постоење. Токму врз таа основа, амбасадоре Волерс, би требало да им се држат предавања на Бугарите и на Грците кои, сосем нецивилизациски, сè уште нè негираат како народ. Наместо тоа, со небулозите изнесени во Тетово, точно нив ги поддржувате, што е срамно за Соединетите Американски Држави. Така, сосема свесно, се подбуцнуваат и Албанците во земјава и против името на државата, и против македонскиот народ.
Со оглед дека, поради бесрамното третирање на македонскиот народ, не следеше (заслужен!) црвен картон од нашата држава, ние, од Македонскиот манифест, сакаме да предупредиме да не се плука по нашето гостопримство. Ова е цивилизирано општество, со длабоки историски корени, а не некаква американска колонија или окупирана територија.
Членови на Иницијативниот одбор на Македонски манифест:
Ефтим Клетников, поет, Запро Запров, композитор, Георги Барбаровски, поет, Стојан Стојков, композитор, Стефан Влахов – Мицов, историчар, Слободан Пренџов, универзитетски професор, Васил Атанасов, музичар, Александар Русјаков, писател
Извор: "МКД"
