Путин претставил план во 7 точки за сопирање на насилствата во Украина

Киев мора да ги повлече своите војници од југоисточните региони на Украина а бунтовниците мора да ја сопрат офанзивата за да се стави крај на крвопролевањето, изјавил рускиот претседател Владимир Путин. Тој претставил план составен од седум точки за стабилизирање на ситуацијата, пренесува Раша тудеј.

„На своето патување од Благовесченск до Улан Батор, запишав неколку идеи и планови за акции. Ги имам тука, но напишани на ливче“, им кажал Путин на новинарите.

1. Бунтовниците треба да го сопрат военото напредување во регионите Луганск и Доњецк.

2. Киевските оружени сили треба да се повлечат на одалеченост од која не можат да гранатираат цивилни населби.

3. Имплементирање полна и објективна меѓународна контрола врз набљудувањето и контролата врз примирјето.

4. Исклучување употреба на воени авиони против цивилите.

5. Размена на затвореници/заробеници врз основа на формулата „сѐ за сѐ“ и без условувања.

6. Хуманитарни коридори за бегалците и доставување хуманитарна помош во регионите Луганск и Доњецк.

&. Директен пристап на екипи за поправка на уништената општествена и транзитна инфраструктура.

Путин изразил надеж дека може да биде постигнат конечен договор меѓу Киев и бунтовниците во југоисточна Украина во рамки на средбата на контакт-групата закажана за 5 септември.

„Се надевам дека украинските лидери ќе го поддржат очекуваниот напредок во билатералните односи“, изјавил рускиот претседател.

Тој побарал од Украина активно да се вклучи во работата на контакт-групата „со цел постигнување на сеопфатен договор за ситуацијата во југоисточна Украина, нормално, со целосно и безусловно гарантирање на легитимните права на луѓето кои живеат таму“.

Извор: “МКД“