Седумдесет години од објавата на „Песни“ на Ацо Шопов

Свечен собир по повод 70-годишнината од објавувањето на првата поетска книга на македонски јазик во слободна Македонија, стихозбирката „Песни“ од Ацо Шопов (1944 г.), ќе се одржи денеска напладне во Друштвото на писателите на Македонија

Македонската поезија ја има задолжено светската култура со неколку поети, меѓу кои Ацо Шопов е несомнено еден од најзначајните

ЈУБИЛЕЈ 

Собирот ќе го отвори претседателот на ДПМ, Веле Смилевски, а за литературно-историските аспекти на стихозбирката на Шопов ќе зборува Соња Стојменска-Елзесер. Средбата ќе биде збогатена со искажување на Гордана Михаилова-Бошнакоска на тема „Очите и љубовта во поезијата на Ацо Шопов“ и со сеќавања на Михаил Ренџов за Ацо Шопов. 
По повод одбележувањето на овој значаен книжевен датум, издавачката куќа „Сигмапрес“ објави фототипско издание на книгата „Песни“. Реализаторката на овој оригинален издавачки проект, Маја Бојаџиевска, ќе има искажување на тема „Седумдесет години подоцна“.

Јубилејот утре ќе го одбележи и Катедрата за македонска книжевност и јужнословенски книжевности при Филолошкиот факултет „Блаже Конески“ со промоција на повеќејазичен интернет-портал „Лирскиот дом на Ацо Шопов“. Ќе се обратат Славица Велева, деканка на Филолошкиот факултет, Весна Мојсова-Чепишевска, раководителка на Катедрата за македонска книжевност, а порталот ќе го претстави Јасмина Шопова, препејувач и ќерка на поетот, која е и носителка на овој проект.
Македонската поезија ја има задолжено светската култура со неколку поети, меѓу кои Ацо Шопов (1923-1982 г.) е несомнено еден од најзначајните. Неговите збирки „Песни“, „Небиднина“ и „Гледач во пепелта“ се едни од најфасцинантните. 

Тој е еден од основоположниците на современата македонска книжевност. Неговата прва збирка „Песни“ e прва книга на македонски јазик објавена во слободна Македонија. Бил претседател на Друштвото на писателите на Македонија (ДПМ) и негов член од основањето во 1947 г., прв претседател на Советот на фестивалот „Струшки вечери на поезијата“ и претседател на поранешниот Сојуз на книжевните преведувачи на Југославија, член на Македонската академија на науките и уметностите од нејзиното основање (1967 г.), член на Македонскиот ПЕН-центар, долгогодишен директор на издавачката куќа „Македонска книга“, главен уредник на повеќе списанија, меѓу кои и сатиричниот весник „Остен“. Бил и амбасадор на СФРЈ во Сенегал (1971-1975 г.), а ја завршува својата кариера како претседател на Републичката комисија за културни врски со странство.
Ацо Шопов има објавено тринаесет збирки поезија и исто толку избори од поезијата на македонски јазик, како и петнаесетина избори препеани на странски јазици.

Извор: “Нова Македонија“