Античките мозаици од Равена во Археолошкиот музеј

Пред македонската јавност за прв пат се изложени 25 избрани мозаици од вкупната колекција од 60 мозаици, кои се светско културно наследство и се заштитени од УНЕСКО …

Колекцијата е изработена во почетокот на 50-тите години од 20 век, а делата се идентични копии на оригиналите кои и денес се неразделив дел од монументалните градби во Равена. Во Археолошкиот музеј на Македонија синоќа беше отворена изложбата „Античките мозаици од Равена”. Изложбата ја отворија министерката за култура Елизабета Канческа-Милевска и амбасадорот на Италија, Ернесто Масимино Белели.

Пред македонската јавност за прв пат се изложени 25 избрани мозаици од вкупната колекција од 60 мозаици, кои се светско културно наследство и се заштитени од УНЕСКО. Колекцијата е изработена во почетокот на 50-тите години од 20 век, а делата се идентични копии на оригиналите кои и денес се неразделив дел од монументалните градби во Равена. Изведбата на копиите била под кураторство на група мозаичари од Академијата за ликовни уметности, кои го чувале древниот рачен занает. Во последните педесет години различни селекции на овие дела, кои се сопственост на градот Равена, се изложувани во повеќе градови во Европа и во светот. Македонската јавност за прв пат има можност да ги види најзначајните дела од оваа колекција кои конечно пристигнаа во родната земја на императорот Јустинијан, кој бил и инспирирачка фигура за нивното создавање.

Равена е престолнина на мозаикот, чувар на најбогатото светско наследство на антички мозаици од 5 и 6 век. Тој е антички град на северниот брег на Јадранското Море кој пред 1500 години бил престолнина на западната Римска Империја, престолнина на Теодорико – првиот готски крал и престолнина на византиската империја во Европа. Од тој период е огромното наследство од религиозни градби декорирани со мозаици. Во мозаиците од Равена е родена христијанската иконографија; испреплетеност на реализам и симболизам, на римски и византиски влијанија. Седумте свети градби во Равена, кои во својата внатрешност ги имаат мозаиците од оваа изложба, во 1997 година УНЕСКО ги прогласи за светско културно наследство.

Изложбата, која се реализира по повод претседавањето на Италија со Европската Унија, ќе биде отворена до 8 јануари 2015 година.

Извор: “Cooltura.mk, Telegraf.mk“