Путин: Сакаа да ја зауздаат Русија, но не си го дозволивме југословенското сценарио (ВИДЕО)

Русија верува во себе, во тоа дека многу може и дека сѐ ќе оствари, изјавил денес рускиот претседател Владимир Путин, истакнувајќи дека Русија не си дозволила да тргне по патот на распадот според југословенското сценарио, пренесува Тасс.

„Со задоволство ќе нѐ пуштеа по југословенското сценарио на распаѓање и поделба со сите трагични последици што би ги имало тоа за руските народи. Не се случи. Не го дозволивме“, кажал Путин, додавајќи дека Русија тоа не му го дозволила во минатото ни на Хитлер.

Заблагодарувајќи им се на Русите за поддршката и солидарноста во моментите кога се решава иднината. Путин кажал дека разговорот со Русија од позиција на сила е бесмислен.

Обраќајќи се пред Федералното собрание на Русија, Путин кажал дека политиката на зауздување на Русија не е смислена вчера, туку дека се спроведува секогаш кога некој смета дека Русија станала премногу самостојна, пренесува Тасс.

Путин повторил дека санкциите им штетат на сите, па и на тие што ги воведуваат, како и дека Москва нема намера да ги урива односите со Европа и Америка.

Нарекувајќи го спојувањето на Крим со Русија историско, Путин кажал дека за Русија Севастопол има огромно цивилизациско и свето значење и дека Русите кон тоа секогаш така се однесувале и така ќе се однесуваат.

Според Путин, секој народ има неотуѓиво право на сопствен пат на развој и Русија секогаш кон тоа ќе се однесува со почит.

Тоа, како што истакнал, се однесува и на Украина, но додал дека лицемерите со разговори за човекови права го прикриваат државниот удар во Украина.

Не треба да се „политичари“, туку треба да ѝ се пружи помош на Украина во реформите, кажал Путин и додал дека неговите западни колеги „не брзаат да го направат тоа“.

Притоа истакнал дека Русија го кредитирала украинското стопанство со 33,5 милијарди долари само во последниот период.

Ова е 11-то обраќање на Путин, а во Кремљ се собрале над илјада гости – пратеници на горниот и долниот дом, членови на владата, раководители на уставниот и врховниот суд, гувернери, претставници на водечките религии, и претставници на главните медиуми.

Извор: “МКД“