ФОТО: МОНОГРАФИЈА „70 ГОДИНИ МАКЕДОНСКА ФИЛХАРМОНИЈА“ 

ФОТО: Киро Попов

Македонската филхармонија го одбележа седумдецениското постоење со промоција на монографија во која низ документи, фотографии и сведоштва е раскажан развојот на оваа најстара музичка институција - од нејзиното формирање во 1944 до денес.

Монографијата „70 години Македонска филхармонија“ од авторите Тина Иванова и Роза Нолчева-Ангеловска е објавена со поддршка на Министерството за култура и за неа министерката Елизабета Канческа-Милевска на денешната промоција рече дека е импозантно издание во кое на речиси 300 страници се испишани личните доживувања на сите што учествувале во создавањето на оркестарот. 

- Монографијата е документ во кој е прикажан растежот на институцијата, изведбата на повеќе од 400 симфониски дела со најзначајните имиња на денешницата, впечатливите настапи низ целиот свет - референците на Македонската филхармонија со кои се гордееме сите. Публикацијата сведочи и за денешните успеси на оркестарот, за грандиозните проекти, зборува за визиите, идеите и за идните предизвици, рече Канческа-Милевска.

Авторките се музиколози кои ја следат работата на Филхармонијата во изминатите 20-ина години, а за основањето и првите години од постоењето истражувале од архивата на Филхармонијата и претежно од написите и рецензиите што низ годините се објавувани во дневниот печат.

- Книгата ја пишувавме така како што самите сакавме да ја читаме, во есеистичко-публицистички манир, без сирова статистика иако таа постои во самите приказни. Прашањето беше што да се стави во една книга од илјадници концерти и уште толку солисти и диригенти кои стапнале на подиумот на Македонската филхармонија. Целта ни беше да го извлечеме најсуштинското, најважното, па и најатрактивното дури и за оние читатели на кои музиката не им е животна определба, рече Иванова.

Коавторката Нолчева-Ангеловска додаде дека 70-те години опишани во публикацијата се плод на макотрпна работа на сите вклучени во организирањето на концертите, не само на тие во уметничкиот дел, туку и на луѓето од администрацијата.

- Благодарение на публиката која редовно ги посетува концертите на Филхармонијата секој четврток, тоа е причината зошто овој оркестар постои и создава величствена музика, рече Нолчева-Ангеловска, заблагодарувајќи им на сите музичари, диригенти и вработени во Филхармонијата кои ја вложиле енергијата и креативноста во оваа институција. 

Директорката на Македонската филхармонија Маја Чанаќевиќ соопшти дека јубилејот ќе биде прославен и со концерт на 18 декември во МОБ, на кој како солист ќе настапи рускиот пијанист Борис Березовски, а диригент ќе биде неговиот сонародник Дмитри Лис. 

По повод 70 години постоење Македонската филхармонија неодамна доби и Орден за заслуги за Македонија од Претседателот на Република Македонија. 

Извор: “Утрински Весник“