ФИЛХАРМОНИЈАТА ГО ОДРЖА КОНЦЕРТОТ „ГО СЛАВИМЕ ЈУБИЛЕЈОТ“ 

На концертот во МОБ настапи виртуозот на пијано, Борис Березовски, а диригираше Дмитри Лис

ФОТО: Петр Стојановски

Македонската филхармонија вчеравечер во Македонската опера и балет го одржа концертот „Го славиме јубилејот“ во рамките на годинешното одбележување на своето 70 годишно постоење. Со оркестарот диригираше рускиот диригент Дмитри Лис, кој се смета за еден од најдобрите диригенти во Европа од неговата генерација, а како солист настапи еден од најмоќните пијанисти на денешницата, виртуозот на пијано, Русинот Борис Березовски. Беа изведени дела на Петар Илич Чајковски - Концертот за пијано и оркестар бр. 1 во б-молл, и неговата Петта симфонија во е-молл. 

„Во изминатите 70 години Македонската филхармонија го градеше дигнитетот и достоинството на македонската уметност, докажувајќи дека во Македонија постои неверојатно богат креативен потенцијал, кој е наш личен печат за идентификација во светот“, истакна пред почетокот на концертот, министерката за култура Елизабета Канческа-Милеска. 

Македонската филхармонија оваа концертна година ќе ја заврши со традиционалниот Новогодишен симфониски концерт за најмладите, кој ќе одржи на 21 декември во Универзалната сала со почеток во 12 часот и со празничен џез-концерт на 24 декември во МНТ каде ќе изведе дел од најпознатите џез-нумери аранжирани за оркестар. Солист на концертот ќе биде вокалистката Марија Димитријевиќ. Новата година за Филхармонијата ја започнува на 7 јануари 2015 кога ќе го одржи најавениот пладневен концерт во духот на Божиќ. (К.Б.) 

Извор: “Утрински Весник“