„Феникс“ и „Македонија презент“ почнуваат акција за читање македонски автори и книги

Издавачката куќа „Феникс" и Фондацијата за културна и научна афирмација и презентација „Македонија презент" од 20 февруари покренуваат акција, односно кампања наменета за македонските автори и книги.

За таа цел, во Културниот центар „Феникс“ ќе се овозможат промоции на книги на сите заинтересирани автори од Скопје и Македонија, потоа разговори со веќе афирмирани писатели, но и нови и млади литературни творци, ќе се организираат курсеви за креативно пишување, како и креативни и едукативни работилници и слично.

Една од првите активности ќе биде препорачувањето на книгите од македонски автори на стеблата од Градскиот парк и пофреквентните дрвореди во Скопје, потоа секојдневното препорачување на македонските автори и книги преку фејсбук на профилот „Македонски автори и книги“, избирањето на највредните дела и составувањето неделни топ-листи; во соработка со библиотеките ќе се избираат и наградуваат најдобрите читатели; ќе се организираат минисаеми на книгата на отворено, но и бројни други активности и идеи.

По кампањата за македонските автори и книги, организаторите на оваа акција планираат сличен проект и за македонските сликари и нивните дела, при што  посебен акцент ќе биде ставен врз современото ликовно и книжевно творештво кај нас.

Извор: “МКД“