|
ПО МОНТ ЕВЕРЕСТ И К2, СКРОТЕНА И АНАПУРНА 1
Голем, несекојдневен подвиг оствари македонскиот планинар и алпинист Здравко Дејановиќ. По искачувањето на највисокиот светски врв Монт Еверест (8.848 метри) во 2010 година, потоа на најтешкиот и втор по височина врв, К2 (8.611 метри) во 2014 година, Дејановиќ ја заокружи својата „хималајска трилогија“ и вчера стапна на најопасниот и најмалку искачуван врв во светот, Анапурна 1 (8.091 метар).
Ова е прво искачување на Анапурна 1 годинава. Покрај Дејановиќ, на врвот стигнаа уште тројца кинески алпинисти, по еден од Финска, Турција и од Иран и шесте шерпаси. Вообичаено обидите за искачувања на Анапурна 1 се во април-мај, наместо во март-април, но промената беше направена за да се избегнат снежните лавини, кои се најголемата опасност за алпинистите во тој периодот од годината.
- За Анапурна 1 почнав да правам планови многу брзо по искачувањето и враќањето од Монт Еверест, за кого претходно мислев дека тоа е тоа, крај, по него нема друго во овој спорт. Но, кога малку се одморив и ги средив мислите, почна да ме јаде црвот и како следна цел веднаш ми се наметна Анапурна 1, од многу причини. Тоа е еден од најопасните врвови за искачување, што се гледа и од малата бројка, под 200 успешни обиди, од првото во 1950 година. Годишно од неколку десетици врвни алпинисти, само еден или двајца стигнуваат до врвот, а во 2013 и 2014 година ниту еден. Тие работи ми беа предизвик и некаков вид инспирација - изјави Дејановиќ за „Нова Македонија“ пред заминувањето за Непал, во февруари.
Анапурна 1 е десетти светски врв по височина и еден од 14-те над 8.000 метри. Тој е и првиот искачен врв над 8 км, на 3 јуни 1950 година од Французите Морис Херцог и Луис Лашенал. Враќањето на Дејановиќ во Македонија би требало да биде за десетина дена, освен ако тој не реши да се искачува на уште еден хималајски врв, Лотце (8.516 метри), четвртиот по височина во светот.
Дејановиќ и искачените врвови над 5 км
ВРВ ЗЕМЈА ВИСОЧИНА ГОДИНА
М. Еверест Непал 8.848 2010
К2 Пакистан 8.611 2014
Анапурна 1 Непал 8.091 2015
Музтаг Ата Кина 7.546 2009
Пик Ленин Киргистан 7.134 2011
Аконкагва Аргентина 6.959 2006
Елбрус Русија 5.642 2005
Арарат Турција 5.137 2004
|
|
