Лавров: Украина го држи клучот на односите меѓу Русија и ЕУ

„Очигледно е дека Вашингтон не сака успех на договорот од Минск и надминување на кризата во односите меѓу Русија и ЕУ, иако државниот секретар на САД Џон Кери постојано ме уверува во спротивното“, заклучил Лавров.

Шефот на руската дипломатија Сергеј Лавров кажал дека односите меѓу Русија и Европската Унија зависат од имплементацијата на договорот од Минск, пренесува Раша тудеј.

Тој додал и дека Киев со блокирањето на извршувањето на договорените обврски ја блокира и нормализацијата на односите.

„Преку тоа сега Украина го држи клучот на регулацијата на односите меѓу Русија и Европската Унија. Киев го користи тоа што Европската Унија ја поврзува својата политика кон Русија со спроведувањето на договорот потпишан во Минск“, истакнал Лавров.

Според него, кога едната страна мора да купи време, идејата е да се тргне вниманието од главниот проблем, а идејата за европски миротворци во Украина е класичен пример.

„Русија е подготвена да го слушне мислењето на Киев, само ако претставници на регионите Доњецк и Луганск се вклучени во дискусијата, но Украина мора да објасни зошто мисија на европски миротворци би можела да има поголем ефект од мисијата на ОБСЕ“, истакнал Лавров.

Тој додал и дека сите негови колеги од странство со кои разговара на средбите доаѓаат под притисок на амбасадорите од САД.

„Очигледно е дека Вашингтон не сака успех на договорот од Минск и надминување на кризата во односите меѓу Русија и ЕУ, иако државниот секретар на САД Џон Кери постојано ме уверува во спротивното“, заклучил Лавров.

Извор: “МКД“