НАТО и Русија наскоро повторно на линија: враќање на „црвениот телефон“

НАТО повторно ја воведува тајната директна телефонска линија со рускиот воен врв, пишува германскиот весник Франкфуртер алемајне цајтунг, повикувајќи се на извор во Алијансата.

Германскиот весник тврди дека директен контакт со Москва ќе имаат командантот на заедничките сили на НАТО во Европа и претседателот на Воениот комитет на Алијансата и се верува дека „црвениот телефон“ ќе биде постојано отворен, иако не се наведува кој ќе биде на линија од другата страна - во Москва, пренесе агенцијата Спутник.

Иницијативата за воспоставување контакт ја покренал германскиот министер за надворешни работи Франк-Валтер Штајнмаер поради зголемувањето на напнатоста во светот, предизвикано од украинскиот конфликт.

Тој предложил да се воспостави директна врска меѓу двете команди, за да се спречи директен судир во случај на уште поголема криза.

Штајнмаер се смета за поддржувач на умерениот став кон Русија и познати се неговите претходни изјави дека не е во интерес на Европа на долг рок да се изолира Русија, како и неговиот говор против зајакнувањето на санкциите кон Москва во кој истакна дека прво треба да се провери како се исполнува договорот од Минск.

Ова е прв обид на директно поврзување на двата воени врва од прекинот на Студената војна, а е предизвикан од драматичната ескалација на односите меѓу НАТО и Русија.

Ваквата директна линија, но помеѓу тогашните раководства на Советскиот Сојуз и Соединетите Американски Држави, беше наречена „црвен телефон“ и беше воспоставена и за време на Кубанската ракетна криза во 1962 година, кога светот навистина беше на работ на нуклеарна војна.

Извор: “МКД“