Порошенко го бара Блер за советник

Украинскиот претседател Петро Порошенко го повика бившиот британски премиер Тони Блер да биде дел од претседателскиот советнички тим. По средбата во Киев, Блер порача дека Украина се соочува со големи предизвици од „руската агресија и корупцијата“, пренесува „Русија денес“

- Украинските лидери не ги следат само своите интереси туку и вредностите, како слободата, демократијата и желбата да му служат на народот - истакна Блер, кој на чело на британската влада беше во периодот од 1997 до 2007 година. 

Зборувајќи пред новинарите во Киев, Порошенко порача дека Украина ги спроведува реформите. Според „Русија денес“, Блер го прашал украинскиот лидер каква помош му е потребна на официјален Киев од меѓународната заедница. 

Во советничкиот тим на украинскиот претседател се и бившиот грузиски лидер Михаил Сакашвили, поранешниот шеф на шведската дипломатија Карл Билт, словачкиот реформатор Микулас Џуринда и економистот Андерс Аслунд. Американскиот сенатор Џон Мекејн, од редовите на Републиканската партија, изјави дека ја одбил понудата на Порошенко поради правилата и прописите на американскиот Конгрес. 

„Русија денес“ наведува дека Блер од 2007 година, кога ја напушти премиерската функција, почнал профитабилен бизнис како советник. Според руската агенција, тој советува повеќе влади и корпорации во светот, а за една минута говор заработува и до 6.000 фунти.

Извор: “Нова Македонија“