Галичка свадба: трескавично лудило додека свири „Тешкото“ (ФОТОГАЛЕРИЈА)

Се надмудруваат на маса која направила поубава погача, мајката или свекрвата на невестата. Трпезата е полна. Галичко сирење, погачи, пити, а сватовите испоседнале еден спроти друг и наздравуваат за здравје на младите.

Невестата Билјана скришум ѕирка од зад завесата во невестинската куќа и низ прстен го гледа избраникот на своето срце. Зетот Филип Белчев гордо го јава својот коњ, обидувајќи се да ја шармира идната невеста. Сватови облечени во галички носии и цела коњаница се движат низ тесните галички улици, додека публиката е целосно шармирана од случувањето, кое се одвива на ист начин на кој се одвивало пред стотици години. Тапаните грмат, а зурлите пиштат и го полнат просторот со архаична, прадедовска смисла.

Канење на мртвите, бричење на зетот, одење по невестата, и на крајот судбоносното „да“ во црквата „Св. Петар и Павле“.

Годинава четириесет и второто издание на Галичката свадба го проследија околу 2.000 посетители, како од земјава, така и од странство.

Никој не остана рамнодушен на старите адети, на трескавичното лудило додека се вие „Тешкото“, на корените...

http://www.mkd.mk/makedonija/galichka-svadba-treskavichno-ludilo-dodeka-sviri-teshkoto-fotogalerija#1

Извор: “МКД“