ЧЕСТВУВАЊЕ ЗА ДЕЦАТА БЕГАЛЦИ ОД ГРАЃАНСКАТА ВОЈНА ВО ГРЦИЈА 1946-1949

Денес, на денот на големиот подвижник, Преподобниот Свети Сисое Велики, исцелител на болните, изгонувач на демоните, воскреснувач на мртвите и заштитник на децата, се одржa традиционалното годишното чествување за децата бегалци, насилно прогонетите деца Македонци од Егејскиот дел на Македонија за време на Граѓанската војна во Грција 1946-1949 година.

Делегаци на здруженијата на Македонците од Егејскиот дел на Македонија, Сојузот на Македонците од Егејот МАКЕДОН, Светскиот Македонски Конгрес, Матицата на иселениците од Македонија, Македонската заедница од Холандија,  Македонската заедница од САД и пратеничката група на ВМРО ДПМНЕ, положиja свежо цвеќе на Споменикот на децата бегалци во паркот Жена-борец во Скопје.

-Споменот и поменот за голготата на насилно прогонетите Македонци од Егејот е наш аманет и секоја година ќе го одржуваме ова чествување, и за живите и за упокоените, рече претседателот на  Сојузот на Македонците од Егејот МАКЕДОН, Ташко Јованов .

-Не ги забораваме патилата низ кои поминаа нашите претци тие беа прогонети како деца, но денес живи се потомците, традицијата ќе ја продолжиме, било да не се повтори. Илинденската епопеја е светилник во чиј пресрет одбележуваме значајни датуми, настани и личности од историјата на Македонците и на Македонија. Насилно прогонетите деца Македонци од Егејскиот дел на Македонија за време на Граѓанската војна во Грција 1946-1949 година се најцрната страница во историјата на македонскиот народ од Втората Светска Војна, рече претседателот на  Светскиот Македонски Конгрес, Тодор Петров.

Годинава, по иницијатива на Зружението за духовно обединување на Сетинци, Попадинци и Крушоради од Лерин во Македонија, Споменикот на децата бегалци во Жена парк беше реновиран и исчистен.

Извор: “Инфомакс“