Тргна коњаницата „Патот на црешовото топче“

Учесниците во коњаницата прво примија благослов од свештенството на манастирот, а потоа се упатија кон Галичник и бачилото Салатаница, каде и ќе ноќеваат. Покрај во бачилото Салтаница, коњаницата ќе ноќева и во селота Кнежино, селото на Јордан Пиперката, Козица, и селото во кое загина Христо Узунов, Цер.

- Денес по шести пат од манастирот Свети Јован Бигорски  тргна коњаницата „Патот на Црешовото топче,“ која за Илинден ќе пристигне на Мечкин Камен во Крушево и ќе биде дел од дефилето на прославата на 2 август. Коњаницата својот пат го започна од манастирот во село Јанче, каде од свештенството прими благослов за среќен пат. Во наредните четири дена нашата коњаница ќе ноќева покрај бачилото Салтаница, и во селата Кнежино, Козица и Цер. Коњаниците на сите локации ќе ноќеваат на отворено, без притоа да користи било какви објекти од тврда градба - рече Небојша Јовановски, претседател на здружението Бигорски манастир „Патот на црешовото топче“.

Тој потсети дека годинешниот Илинденски марш е посветен на двајцата гостиварски полицајци Ненад Серафимовски и Горан Илиевски, кои ги загубија животите во мајските немири во Куманово. За да се потсетат на овие херои коњаниците ги посетија и гробовите на Серафимовски во село Зубовце и Илиевски во Гостивар. 

Инаку, коњаницата „Патот на црешовото топче“ е иницирана од случувањето во периодот на Илинден 1903, кога во манастирот „Свети Јован Бигорски“ свештениците и нивните помагатели изработувале црешови топчиња, кои по оваа маршрута по која се движи коњаницата, ги испраќале на востаниците во Крушево.