УБАВИНА ОД КОЈА ЗАСТАНУВА ЗДИВОТ: 10 Македонски села кои ќе ви го одземат здивот!

Македонија ги поседува сите услови за успешен селски туризам. Во продолжение ви го прикажуваме нашиот избор за втората листа на 10 најубави села во Македонија, со десет нови дестинации, еднакво вредни за посета колку и претходните. Порталот Block.com.mk ви претставува 10 Македонски села од кои застанува здивот!

Вевчани

После селото Велешта, во падините на планината Јабланица е сместено едно најубавите македонски села. Освен што е препознатливо по традиционалниот карневал кој секоја година се одржува на Василица 13-ти и 14-ти јануари, Вевчани изобилува со неверојатна природна убавина, а вистинска атракција се Вевчанските извори.

Стење

На влезот на селото Стење е поставена и табла на која се испишани информации за природните и културните убавини на селото, Преспа и Преспанското Езеро и за островот Голем Град. Во заливот Лиса има панорамски поглед на езерото. Ова е само дел од тајната на Стење и неговата околина. Мештаните имаат обичај и да се пошегуваат со дојденците, велејќи дека не сакаат да ги откриваат убавините на селото бидејќи ќе привлечат голем број посетители, со што недопрената дивина ќе биде уништена.

Белица

Белица се наоѓа во Поречката област, во подножјето на планинскиот масив Мокра Планина (Даутица, Јакупица и Караџица) на надморска височина од 600 до 680 метри . Во овој предел се наоѓаат изворите на најубавата река во Македонија, реката Белешница, која преставува најголема притока на реката Треска. Во околината на селото има неколку подземни пештери кои изобилуваат со внатрешна пештерска кореогафија, како што се пештерите: Момичак, Лапарница и Гулубарница.

Папрадиште

Во областа Азот во западната страна на велешката околија, сместено на 1.000 метри надморска височина, каде што орлите се гнездат под врвот Солунска Глава, на падините на планината Јакупица се наоѓа мијачкиот „остров“ во централна Македонија – селото Папрадиште. Престојот во ова село е задоволство, било да е лето или зимa. Името го има добиено поради изобилството на папрат во селото и во околината. Со асфалтен пат е поврзано со селото Богомила од кое е оддалечено осум километри.

Тресонче

Тресонче е едно од најстарите села во Република Македонија. Неговото име најнапред било Старо Село. Се наоѓа во срцето на планината Бистра, во западна Македонија, а е распослано по левата и десната страна на Тресонечка или Мала Река. Низ историјата се споменува како дервенџиско село, а неговите главатари неколкупати се среќавале со турските султани во Цариград, поради што Тресонче е и споменувано во султанските дефтери како стратегиски значајно село на патот кој од Кичево и Дебар водел кон Елбасан, Косово, Драч и Солун.

Глобочица

Селото се наоѓа на западните падини на Караорман, на бреговите на езерото Глобочица. Преку езерото, жителите на некогашна Глобочица веќе две децении создаваат нов живот во новоизградената населба создавана со бројни работни акции кои на мештаните им го јакнат чувството на заедништво, а на населбата и даваат лик кој плени. Пред  повеќе од 20 години тие го обновија и манастирот „Св. Антониј“ до кој води уредена шумска патека.

Зовиќ

Селото Зовиќ се наоѓа во средишниот дел на областа Мариово. Припаѓа на Општина Новаци и со тоа влегува во рамки на пределот на битолско Мариово. Сместено е на една карпеста зарамнетост веднаш над самиот лев брег на Градешка Река. Расположено е на надморска височина од 725 метри помеѓу два ридски гребени на југ и север на чиј врв е изградена малата црквичка Свети Атанасиј, во подножјето на висорамнината Добро Поле. Иако куќите на селото лежат во благо зарамнетото подножје помеѓу двата ридови, според надморската височина Зовиќ е ридско село. Крај селото веднаш по познатиот Зовички мост, Градешка Река која извира и дотекува од планината Ниџе навлегува во карпеста клисура од каде кај местноста Еленик се спојува со реката Сатока која потоа се влева во Црна Река.

Слепче

Слепче се наоѓа западно од градот Демир Хисар, а десно од патот Кичево – Демир Хисар, на 680 м. над. вис. Земјиштето на Слепче е 24,5 км², од кои шумите заземаат површина од 1737 ха или поголемиот дел од земјиштето, обработлива површина заземаат 365 ха, а пасиштата 367 ха.

Смолари

Живописното струмичко село Смолари се наоѓа во северното шумовито подножје на планината Беласица наречено Подгор, оддалечено околу 25 километри од градот Струмица во југоисточна насока, на надморска височина од 360 метри. Вгнезден длабоко во северните падини на планината Беласица, скриен помеѓу столетните букови дрвја над селото Смоларе, тече Смоларскиот водопад, на надморска височина од 600 м. Тој претставува ретка природна убавина, која долг период беше сокриена од љубителите на природата, поради својата непристапност.  Планинската патека преку 300 скалила ве води до чудото на природата, а на целта ве очекува досега невидена убавина, што ќе ви го одземе здивот.

Радожда

Радожда е крајбрежен рај кој за разлика од другите комерцијализирани локалитети на Охридското езеро го красат и облагородуваат мир, спокој, тишина која во лето ја брануваат летните бубалки, шумот од лисјата од како крв црвените муренки и езерските шамаци. Доколку сте љубител на опуштените летни денови, езерска хармонија која ги одмора и релаксира мислите, како и мирна и чиста езерска вода во која ќе се изнауживате и разладите – Радожда е вистинскиот избор за вас.

Извор: “Инфомакс“