Американски судија пресуди дека масовното собирање телефонски податоци од страна на Националната агенција за безбедност (НСА) е неуставно.

Сојузниот окружен судија Ричард Леон рече дека практиката на електронската разузнавачка агенција била „произволна инвазија".

Собирањето „метаподатоци" на агенцијата, вклучувајќи телефонски броеви и време и датуми на повиците, беше обелоденето од поранешниот соработник на НСА, Едвард Сноуден.

Белата куќа го отфрли предлогот Сноуден да добие амнестија ако престане да обелоденува документи.

Во пресудата во сојузниот суд во Вашингтон, Леон ја нарече програмата на НСА за надзор „недискриминирачка" и „речиси орвелска технологија која и' овозможува на владата да ги чува и анализира телефонските метаподатоци на секој телефонски корисник во САД".

Пресудата дојде во тужба поднесена од страна на конзервативниот активист Лари Клајман, корисник на мобилен телефон „веризон", кој го оспорил собирањето метаподатоци на НСА во негово име и во име на клиент.

Леон пресуди дека тужителите демонстрирале „значајна можност за успех по законските права на нивното повикување на четвртиот амандман и дека тие ќе претрпат непоправлива штета", мислејќи на клаузулата во уставот на САД која забранува неразумно пребарување и запленување од страна на владата.

Тој издаде прелиминарен налог против програмата на НСА за надзор, но го суспендираше налогот за да се овозможи жалба од одделот за правда, овозможувајќи програмата да продолжи засега.

Клајман изјави за Би-Би-Си дека пресудата „би можела да има непосредно влијание". „Ако НСА продолжи да го прави тоа, тие сега се известени дека тоа е нелегално, а ние ќе се обидеме да ги држиме за кривично непочитување на судот".

Преку Глен Гринвалд, новинар со кого има блиски врски, Сноуден даде изјава со која ја поздравува пресудата. „Дејствував според мое верување дека програмите на НСА за масовен надзор нема да издржат уставно оспорување и дека американската јавност заслужува шанса да ги види тие прашања решени од отворени судови", напиша тој, јавува „Њујорк тајмс". (Би-Би-Си)