Кинеското министерство за одбрана остро реагираше на одлуката на Јапонија, за пет проценти да го зголеми воениот буџет во наредните пет години и да ја зајакне одбраната за да има доволно потенцијал да одговори на можните напади од кинеска страна. Кина ја предупреди Јапонија дека им е подобро тоа да не го прават, затоа што во спротивно ќе ги изгазат поради провоцирање немири, кои се и онака на работ да ескалираат затоа што повторно е отворен спорот меѓу двете земји околу превласта над островите во Источното кинеско море. Јапонците овие острови ги нарекуваат Сенкака, а Кинезите Диаоју.
-Апелираме на Јапонија да размисли за својата историја, да остане посветена на мирниот развој и да преземе конкретни мерки со кои ќе одржува мир и прогрес - изјави портпаролот на Министерството за одбрана Генг Јаншенг.
Според планот, кој властите во Токио го одобрија во вторникот, земјата благодарение на зголемениот буџет, ќе го зголеми воениот арсенал прво со беспилотно летало за надгледување - „Г-35 стелт авиони" со американска изработка, и таканаречениот „Аегис" борбен систем за воени бродови. Меѓутоа, официјален Пекинг тоа вооружување го опиша како обид под изговор на национална безбедност да се спроведе таканаречен „проактивен пацифизам" - систем во кој нападот е најдобра одбрана.
-Јапонија продолжува да ја негира својата агресија во текот на Втората светска војна, загрозувајќи го на тој начин поредокот настанат по тој судир, со што се омаловажуваат чувствата на нациите кои биле жртви на војната - истакна Генг.
(Нова Македонија)
27 декември 2013
