На Куба одбележани 55 години од револуција
Во пристаништето Сантјаго на Куба, денеска е одбележана 55-годишнината од кубанската револуција, а на собирот претседателот Раул Кастро предупреди дека земјата се соочува со идеолошко и политичко уривање на социјалистичкиот систем, пренесува МИА
-Светските центри на моќ перфидно ги воведуваат на Куба неолибералниот и неоколонијалниот начин на размислување, посочи Кастро, додавајќи дека тој е убеден оти Куба од таквата ситуација ќе излезе како победник.
Кубанскиот претседател одржа говор на истото место на кое неговиот брат и поранешен лидер Фидел Кастро, во 1959 година прогласи победа над диктатурата на Фулгенси Батиста.
Раул Кастро во говорот повтори дека Куба ќе го брани своето право на самоопределување и националниот суверенитет и нема да се заборави дека социјалистичката револуција била спроведена поради сиромашните граѓани.
Тој посочи дека треба да се вложат напори за усовршување и продлабочување на демократијата на Куба односно народот да се консултира при донесување на сите значајни одлуки.
(Нова Македонија)
2 јануари 2014