„Според некои извори, ЦИА била вмешана во апсењето на Мандела во 1962, што резултирало со негово долгогодишно заробеништво", се вели во тужбата на Рајан Шапиро, кој додал дека починатиот јужноафрикански претседател тогаш бил претставен како „марксистички терорист".
Студентот, кој работи на својот докторат по историја и антропологија во Масачусетс, побарал од федералниот суд во Вашингтон да ѝ наложи на централната американска разузнавачка агенција да ги објави документите поврзани со тој случај, врз основа на законот за слободен пристап до информациите. Според него, агенцијата тоа досега одбивала да го направи.
Портпаролот на ЦИА Шон Бојд за Франс прес изјавил дека ЦИА „генерално се воздржува да ги коментира правните предмети што се предмет на истрага од страна на судовите".
„Иако веќе подолго време се знае дека ЦИА била вмешана во апсењето на Мандела, во јавноста има многу малку прецизни информации за таа вмешаност", се вели во тужбата.
„Исто така, иако веќе подолго време се знае дека американската разузнавачка служба редовно му давала информации на африканскиот режим за движењето против апартхејдот, има премалку информации за тоа. И на крај, иако денес во целиот свет се слави како херој и борец против апартхејдот, американската влада Мандела го прикажувала како терорист и тој бил на листата на терористи сѐ до 2008 година", пишува во документот поднесен во федералниот суд на округот Колумбија (Вашингтон).
(МКД)
12 јануари 2014
