Првиот сеопфатен извештај за состојбата со корупцијата во 28. земји-членки на Европската Унија одекна како гром и тоа глобално - годишно корупцијата ја чини Унијата 120 милијарди евра! Еврокомесарката за внатрешни прашања Сесилија Малмсром, која го презентира извештајот во понеделникот, ќе рече дека тоа е износ рамен на годишниот буџет на ЕУ. Една нигериска новинска агенција ќе ја пренесе веста како ударна, што само по себе кажува многу во која насока се движи „европскиот дух". Европа падна на првиот критериум, кој нам ни го тријат од глава со години. Зборовите на посветената комесарка Сесилија ќе треба да се запаметат: во Европа денеска нема место отпорно на корупција. Некаде повеќе, некаде помалку. Но и земјите од северот, кои речиси и да не знаеле што е тоа корупција, денеска го одгледуваат во дворовите ова миризливо, но отровно цвеќе. Сепак, во извештајот паѓа в очи дека корупцијата најмногу вирее на југот од Европа, каде што веројатно можеме да зборуваме за ендемска корупција. Еден грчки политички аналитичар, пак, им враќа на северњаците, со тезата дека она што тие го викаат „услуги" на југот на Европа (значи и кај нас во Македонија) се вика „корупција".