Во снежната бура, која ја зафати цела Јапонија, досега загинаа три лица, додека 500 се повредени. Поради невремето, кое е најголемо во последните 20 години, се откажани повеќе од 740 авионски летови, а без електрична енергија останале околу 40.000 јапонски семејства. Метеоролошката служба издаде предупредување за опасност од голема снежна бура на подрачјето на главниот град.
Јапонските медиуми јавуваат дека ширум земјата се случиле најмалку 3.200 сообраќајни несреќи предизвикани од лошите временски услови на патиштата. Се очекува денеска и утре во Јапонија снегот да продолжи да паѓа во Токио, па затоа надлежните служби апелирале до граѓаните да не излегуваат од своите домови доколку не е потребно.
Поради снегот времено се затворени аеродромите во Хирошима и Кагава во западниот дел од земјата. Исто така, откажани се и патувањата со брзите возови „Шинкасен" во западниот дел на Јапонија.
(Нова Македонија)
8 февруари 2014
