„Она што сега се случува во Украина ни покажува кој е вмешан од почетокот, но Америка одбра сето тоа да го прави прикриено и од страна. Фактот дека сега Америка е предводник во барањата за решавање на украинската криза зборува за тоа дека тие овој процес го воделе од самиот почеток, но дека дури сега се прикажуваат како лидери“, им одговорил Путин на новинарите за тоа што мисли за улогата на АМерика во настаните во Украина.
Рускиот претседател оценил дека интересите на САД и нивните европски партнери се поклопуваат бидејќи ЕУ сака договор за асоцијација со Украина „и тоа под услови за кои јас сметам дека се крајно неповолни за Украина“, пренесува Итар Тасс.
Претходната власт во Киев, оценил рускиот претседател, се обидуваше да се спротивстави на тоа, но Западот имаше поинаков план во кој беше вклучено военото сценарио, односно неуставното преземање на власта.
Путин, меѓутоа, додал и дека иницијаторите на настаните во Украина не можеле да предвидат до каде сето тоа ќе отиде.
„Иако многумина во Украина ја поддржуваат смената на власта, сепак има многу луѓе на кои тоа не им се допаѓа, ниту пак се согласуваат со начинот на кој дојде до смената. Во тоа немаше ништо демократско“, изјавил Путин.
Рускиот претседател кажал и дека Москва нема потреба да му возврати на Западот со контрасанкции, но порачал дека Русија би можела да размисли за учеството на западните компании во нејзиното стопанство, вклучувајќи ги и енергетските проекти, доколку западните санкции продолжат.
(МКД)
29 април 2014
