Во интервјуто за весникот Георгиевски вели дека веќе не е поборник на идејата за создавање на етнички чисти држави на Балканот.
„Да, оваа идеја сакав да се реализира на балканска конференција на која сите држави ќе ја дадат својата согласност и тоа да биде чекор кон мирот, а не да се соочиме со војна... Ако денес ја анализираме ситуацијата, ќе видиме дека процесите не се тргнати напред. Босна постои само на хартија, таму реално државата не функционира. Косово се уште е поделено и продолжува да создава проблеми меѓу Албанците и Србите. Македонија е во перманентна нестабилност, чиј опстанок денес зависи само од добрата волја на Албанците. Сфатив дека мојата идеја не може да проработи и веќе не сум активен нејзин поборник. И во исто време не верувам дека освен преку севкупно разбирање, ситуацијата на Балканот нема да може да се смири".
За демографските процеси во Македонија, Георгиевски вели дека за 7-8 години Македонија ќе стане муслиманска, а за 15 години ќе стане албанска држава .
„Кој сака да гледа стратешки на Балканот, треба да го има предвид фактот дека во 2020 година ќе треба да ја третира Македонија како четврта муслиманска држава во Европа. И ќе ви кажам уште нешто - дотогаш проблемот ќе биде наш, македонски, а после проблемот ќе биде балкански и европски".
Тогаш излегува дека неоотоманизмот жнее успеси во Источна Европа, праша новинарката.
„Во Македонија се восхитувааат на неоотоманизмот. Турција е единствената земја во Европа и во светот која ни вели вие сте во право. Ние од ваквата позиција на Турција сме возбудени и максимално ги отвораме вратите на турската културна и економска експанзија преку телевизиски програми, преку масовно навлегување на турскиот бизнис во сите сфери во Македонија. Во сите градови има основни и средни училишта на турски јазик. Во моментов во Македонија студираат повеќе од една илјада студенти од Турција. Тие не само што учат во Македонија, голем процент од нив се женат и остануваат тука. Другиот сериозен момент е засилениот процес на турцизирање на Ромите во Источна Македонија. Тие масовно се преименуваат во Турци. Ромите не само што изјавуваат дека се Турци, сега бараат и турски паралелки по училиштата. Државата тоа им го дозволува. Тука се и Македонците муслимани (торбешите) кои исто така масовно се турцизираат. Значи, ако сакате да го видите неоотоманизмот во живо, дојдете во Македонија и ќе видите дека овој процес на турцизирање ние го правиме со задоволство, бидејќи сите други ни се непријатели, а само Турција покажува пријателство".
На прашањето зошто Македонците не ја признаваат бугарската врска, Георгиевски вели:
„Тоа е парадоксално! Јас понекогаш се плашам. Дали овие процеси кои се развиваат во моментов кај нас, не се вистински страв од реалноста со кој народ сме најблиски и со кој народ делиме иста приказна".
За договорот за добрососедски односи Георгиевски смета дека најдобра основа е токму декларацијата што тој ја потпишал како македонски премиер со неговиот тогашен бугарски колега Иван Костов. Тој смета дека процентот на историјата на Македонија и Бугарија не треба да е во коренот на овој договор, јас и Костов не се занимававме со историја и тогаш односите меѓу Македонија и Бугарија беа на највисоко ниво. „Факт е дека антибугарската политика во Македонија е на сцена и во овие 20 години демократија".
Просрпската политика на Македонија, според Георгиевски, е очигледна со прославата на 100-годишнината од влегувањето на Србите во Македонија во Балканската војна, споменикот на цар Душан во центарот на Скопје и изградбата на српскиот офицерски дом на плоштадот во Скопје, кој е симбол на српската окупација на Македонија. А за нашата заедничка, реална, историја со Бугарија не сакаме да слушнеме - ниту празник да прославиме, ниту личност. Многу ми е мачно што и по 20 години самостојност нашата држава е просрпски ориентирана. Тоа ќе биде катастрофа за македонската нација!
Во однос на спорот со Грција, за Георгиевски нема никакви дилеми – Република Горна Македонија или Република Северна Македонија е сосема прифатливо решение.
(МКД)
22 декември 2013
