Кој може да ги разбере нашите соседи: На бугарски министер му пречи и македонскиот Устав
Шефот на бугарската дипломатија Кристијан Вигенин смета дека по потпишувањето на спогодбата за добрососедство, би требало да се формира комисија стручњаци од Бугарија и Македонија за историја и образование, која треба да ги реши „проблемите со историјата на разумен начин, без емоции".
Тој во интервју за бугарското радио Дарик, изјавил дека не може да отстапи од барањето дека Уставот на Република Македонија не смее да биде основа за мешање во внатрешните работи на Бугарија. Според членот 49 во Уставот, Македонија треба да води сметка за правата на македонското малцинство во Бугарија и Грција.
„Не би сакал да влегувам во детали, но тоа е важен елемент на спогодбата за добрососедски односи за кои преговараме", изјавил Вигенин.
Тој нагласува и дека спогодбата треба да биде напишана на општо прифатената формула „со службените јазици на двете земји: бугарски – според Уставот на Бугарија, а македонски – според Уставот на Македонија".
(МКД)
19 јануари 2014
