Демонстрантите во Тузла денеска ја запалија зградата на локалната власт, додека полицијата во Сараево употреби гумени куршуми и шок бомби за да го растера насобраниот народ пред зградата на Владата
Во Тузла демонстрантите после судирите со полицијата, влегоа во зградата на кантонската зграда и ја запалија, а од зградата во пламен демонстрантите мораа да скокаат од првиот спрат, објави Дневни аваз.
Полицијата претходно се повеќе од зградата пред огромниот налет на демонстрантите, кои влегоа внатре, ја запалија и од неа го исфрлија мебелот.
Демонстрантите појдоа во најголемата офанзива во изминатите три дена од протестите, па со камења, други предмети и рачно направени експлозивни направи интензивно ја гаѓаа зградата на владата, беше претходно објавено. Пред зградата имаше собрано околу 6.000 демонстранти кои пред новинарите изјавија дека не сакаат никакви преговори на кои ги повика кантонската влада, туку сакаат нејзина смена.
Зградата на кантоналната влада во Сараево е обвиткана со чад, а чад излегува и од искршените прозорци на објектот. Околните објекти се исто така со искршени стакла, а полицијата не може да ја смири масата собрана пред зградата на владата. Портпаролот на Министерството за внатрешни работи на Сараевскиот кантон Ирфан Нефиќ изјави дека мнозинството од граѓаните дошло на мирни протести, но одредени групи, поединци и хулигани, го изразуваат својот став така што ја гаѓаат полицијата со камења и шишиња.
Граѓаните во многу градови во Босна и Херцеговина, незадоволни од економската и социјалната ситуација во земјата за денеска најавија протести во знак на солидарност со демонстрантите во Тузла, кои од исти причини веќе трет ден се на улица.
Протести се најавени во Приедор, во Јајце, во Бугојни, во Живинице, во Орешје, во Лукавац, во Бања Лука, во Зеница, во Бихаќ, во Мостар, во Брчко и другите места.
На вчерашните протести во Сараево демонстрантите запалија неколку контејнери, а повеќе часа беше блокирана главната сообраќајница, а врз зградата на Владата фрлаа јајца и камења.
На мирни протести во Ливно се повикани и работниците од уништените фирми, спортските клубови.Протестен марш за денеска е најавен и во Бања Лука, Република Српска.
(Нова Македонија)
7 февруари 2014
