Ќе се реконструира и конзервира античкиот театар во Стоби

НУ Стоби информираше дека активностите во минатите два месеца опфатиле конзервација и реконструкција на радијалните ѕидови 15, 16, 17 и 18 и реконструкција на сводовите меѓу нив, конзервација, реставрација и реконструкција на оштетените делови на вториот циркуларен ѕид во должина од 35 метри и височина од 1,5 до 2 метра.

-Со овие зафати објектот е подготвен за реконструкција на сводовите од тули над централниот радијален коридор и страничните простории, по што ќе следува реконструкција на сводот над централниот циркуларен коридор и лежиштата за седишта, соопшти НУ Стоби.

Проектот предвидува конзервација и на западната половина од театарот, каде што се сочувани оригиналните седишта, како и конзервација на супструкцијата од горниот дел на гледалиштето, каде што седиштата недостасуваат, но се сочувани коридорите за циркулација на публиката.

Изградбата на театарот во Стоби почнала кон крајот на 1 век од нашата ера и била завршена во првата половина на 2 век н.е. Со капацитет за 7.600 гледачи, театарот бил меѓу најголемите објекти за масовна забава во римската провинција Македонија.

Проектот на НУ Стоби за конзервација, реставрација и реконструкција на театарот во Стоби е финансиран од Министерството за култура.