Пронајдениот материјал од археолозите упатува на поврзаност со легендата дека на просторот каде што сега се наоѓа џамијата, некогаш постоела црквата „Св.Ѓорги" бидејќи во досегашните ископувања и истражувања, меѓу другото, пронајдени се епископски печати во кои се споменува Свети Ѓорги, истакна Зоран Алтипармаковски, архитект, виш конзерватор од битолскиот Музеј.
-Нашиот конзерваторски проект поддржан од Министерството за култура продолжува затоа што нашата цел е презентација на Јени џамија како археолошки локалитет и како галерија, функција која и порано ја имаше. Според проектот, се што досега е откриено во и надвор од џамијата ќе биде достапно за јавноста бидејќи ќе биде поставена стаклена галериска конструкција. Во следната фаза ќе го отвориме олтарскиот дел на џамијата, а во последната фаза ќе извршиме конзервација и реставрација на целата џамија, потврди Алтипармаковски.
Од НУ Завод и Музеј-Битола информираат дека крајната цел на овој проект поддржан од Министерството за култура е битолската Јени џамија да биде налик на Аја Софија во Истанбул, истакна архитектот Алтипармаковски под чие водство деновиве завршија истражувањата на петрографскиот споменик врежан во карпа во мариовското село Скочивир.
-Во една карпа над Црна Река во мариовското село Скочивир постои врежан натпис, петрографски споменик, кој до ден-денес не беше дешифриран. Натписот датира од раниот среден век и затоа изработивме елаборат за валоризација на овој споменик, фотодокументација и дешифрирање, а точниот текст за тоа што било напишано во периодот меѓу 5-ти и 6 век ќе го соопштиме за неколку месеци, посочи Алтипармаковски, виш конзерватор во НУ Завод и Музеј-Битола.
(Денешен Весник)
30 декември 2013
