|
КОНЗЕРВИРАНА ЦРКВА ВО МАРИОВО
Историчарот по уметност Благоја Атанасоски, советник-конзерватор од Заводот и музеј, вели дека ова е прва фаза во заштитата на значајниот фрескоживопис, единствен на Балканот.
- Заштитата на фрескоживописот ќе се врши во три фази. Во првата го спасивме живописот во централниот и јужниот брод. Санирани се оштетувањата на сцените од житието на свети Никола. Ги отстранивме напукнувањата, паднатите делови и ги третиравме со соодветни материјали - вели Атанасоски.
Реконзервацијата се врши по цели 40 години.
- Црквата е изградена во 1091 година, а живописана е во 1271 година. Се работи за редок живопис, кој моравме да го заштитиме, бидејќи црквата е една од најстарите, монументална по волумен и по квалитет на живопис, што е реткост на Балканот. Следува уште чистење на солите, на наслагите и ретуширање - додава Атанасоски.
Прилепскиот музеј минатата година ја оцени како успешна. Реализирани се 25 проекти, од кои 18 од заштитата на културното наследство. Најважни проекти се реконструкцијата на опожарените конаци на манастирот „Трескавец", конзервацијата на локалитетот Стибера, реконструкција на покривите на црквите „Св. Никола" и „Св. Димитрија" во Варош, а завршена е и градбата на источниот конак на манастирот „Св. Архангел Михаил".
|
|
