|
|
Авторски концерт за животот и делото на Гоце Коларовски
Авторски концерт за животот и делото на Гоце Коларовски"Ќе се разбудам ли пак..." е насловен концертот посветен на 55-годишнината од раѓањето на истакнатиот македонски композитор Гоце Коларовски, што ќе се одржи вечерва, во 19 часот, на Факултетот за музичка уметностНа програмата ќе прозвучат дела што Коларовски ги создавал низ целиот творечки век, во изведба на студенти од класите по пијано, флејта, соло-пеење и камерна музика, а премиерно ќе бидат изведени и неколку композиции.
Животот и дејноста на Гоце Коларовски (1959-2006 г.) претставуваа пример на ретка посветеност во повеќе области на македонската музичка култура. Коларовски беше композитор, чие творештво стекна признание во повеќе земји, како и декан и долгогодишен професор на ФМУ, од каде што благодарение на него произлегоа повеќе студенти, денес веќе активни и етаблирани композитори од помладата генерација.
- Со овој концерт, токму на денот на неговото раѓање, ФМУ му оддава почит на ликот и делото на овој голем уметник, педагог и човек што, за жал, не е повеќе меѓу нас. Учеството на студентите на овој концерт е од особено значење, бидејќи тоа е можност подобро да се запознаат со музиката на Коларовски - вели Гордана Јосифова-Неделковска, деканка на ФМУ.
Со овој концерт, ФМУ ќе го обнови специјалниот циклус концерти, насловен „По страниците на творештвото на...", посветен на истакнати композитори-професори на ФМУ, што се реализира токму по иницијатива на Коларовски.
(Нова Македонија) 6 февруари 2014 |
|
| Views: 182
| Added by: Вељанко
|
|
|