СВЕТИ ПРОРОК АМОС
Светиот пророк Амос е трет од 12-те мали пророци, живеел во VIII век до Рождеството Христово. Во она време еврејскиот народ бил разделен на две царства: Јудејското и Израилското. Во Ерусалим владеел јудејскиот цар Озија, а со 10-те израилски колена кои се одвоиле - Јеровоам II, идолопоклоник. Во Ветил тој поставил кумир во облик на златно теле, на кого и му се поклонувале израилците кои отстапиле од Вистинскиот Бог.
Пророкот Амос бил јудеец, од местото Фекуи. Прост и необразован, но силен по вера и ревност за слава на Вистинскиот Бог овчарот бил одбран од Господа за пророчка служба и испратен во Израилското царство за разобличување на нечестивиот цар Јеровоам и израилците кои отстапиле од Бога. Пророкот им ги претскажувал големите несреќи, на кои ќе биде подложено Израилското царство и незнабожечките народи кои го опкружуваат, за својата нечестивост. Поради своите разобличувања пророкот Амос повеќе пати бил тепан и трпел прогонство. Но пак се враќал во Ветил и, застрашувајќи ги со неминливите несреќи, продолжувал да ги повикува израилците на покајание. Особено пророкот бил мразен од жрецот на идолскиот храм, Амасиј. Пророкот му претскажал нему и на целиот негов дом брза погибел и за тоа бил тепан. Синот на Амасиј, Озија, го удрил светиот по глава со стап и тешко го ранил. Пророкот Амос, одвај жив, успеал да дојде до своето родно место и таму се упокоил.