СВЕТИ МАЧЕНИЦИ ПРОВ, ТАРАХ И АНДРОНИК
Мачениците Пров, Тарах и Андроник пострадале во 304 година при императорите Диоклецијан и Максимијан. Сите тројца имале значајно потекло. Тарах бил во поодминати години, а Андроник бил се уште момче. Три пати ги истјазавале, пред да ги убијат. На убедувањата да им принесат жртви на идолите свети Тарах велел, дека тој принесува жртва на единиот, велик и вистински Бог, и принесува не во крв, а во чисто срце. “Помогни му на слугата Твој, Господи“! - се молел за време на мачењето свети Пров. “Каде е твојот помошник?“ - се смееле мачителите слушајќи ја неговата молитва. “Знаете ли дека“ - им велел светиот маченик - “кога моето тело страда, мојата душа се исцелува и оживува?“ “Послушај ме, како татко. Види: оние, кои зборуваа безумни зборови, слично на тебе, не примија никаква полза“ - му велел мачителот на Андроник. “Ти мислиш дека јас сум толку безумен“ - одговорил Андроник - “што ќе се покажам полош од своите другари?“ За време на третото мачење на Пров насилно во устата му ставиле жртвено вино и месо, но тој рекол, дека тоа ништо не значи, затоа што него го принудиле. Маките на мачениците биле ужасни, колку што човечката злоба може тоа да го смисли. Најпосле ги извеле на стадионот, за да ги предадат на растргнување на ѕверовите пред очите на многубројниoт народ; но ѕверовите спокојно легнале околу мачениците. Владетелот се разгневил и наредил да ги претепаат организаторите на стадионот и самите ѕверови, а светите маченици да ги исечат со меч. Ги исекле и телата им ги разделиле на ситни делови. Христијаните ги собрале деловите и ги погребале.