Со бадниковата химна и подигање на новото бадникарско знаме в понеделник пред платото на Соборниот храм „Св. Климент Охридски" ќе се одржи 22-то традицонално скопско бадникување, што го организира Граѓанското здружение Одбор за традиционална прослава на Бадник.
Поглаварот на Македонската православна црква Архиепископот охридски и македонски г. г. Стефан во 11 часот ќе му го предаде бадниковиот ќуп на новиот кум-Методија Стефановски-Тоде. Бадниковата здравица ќе ја упати доктор Владимир Плавевски.
На свеченоста на скопјани ќе им се обратат градоначалникот на Скопје Коце Трајановски и стариот кум, бизнисменот Даниел Воиновски, како и новиот кум.
Средбата завршува со чинот на примопредавање на ќупот и кршењето на погачата со златна паричка, што се смета дека ќе му донесе среќа во текот на годината на тој што ќе ја добие. Со пајтонот, симболот на старо Скопје, новиот кум бадникар заедно со ќупот и семејството ќе замине од пред платото на Соборниот храм.
