Тетово - Неконтролирано, неорганизирано и сосема неплански најплодната рамница во Македонија, Полог, се подјадува од сите страни. Највпечатливо е од двете страни на автопатот Тетово – Гостивар, каде што по целата должина од 25 километри веќе се изградени или се во фаза на изградба над 300, пред се', стопански објекти. Но, не е мал бројот и на базените и на помали спортски сали.
Дека се гради неконтролирано е доволно да се помине по автопатот од каде што се наѕираат исправени бетонски столбови за нови објекти. И не се работи само за градби во првата линија на автопатот. На многу места веќе е изградена и втора, а објекти продолжуваат и уште поназад, создавајќи трета линија градби. А плодните површини се зафаќаат и со изградени пристапи до новите објекти.
Од друга страна, сите села во подножјата на Шар Планина и на Сува Гора и Жеден постепено ја освојуваат рамнината. На сите страни интензивно се подигаат најмногу станбени, но и други објекти. Наместо развојот на селата да се насочува кон пониските делови од планината, а со тоа и да се зачува плодното поле, се' се одвива во насока на плодните површини, пренаменувајќи го земјоделското земјиште во градежно.
Стручни луѓе тврдат дека Полог веќе е „помал" за најмалку 1.000 хектари. Но, ако навреме не се стави крај на ваквата неконтролирана изградба, Полог од Јажинце до Вруток ќе се претвори во голем град, а земјоделското земјиште ќе остане само по бреговите на реката Вардар. (Г.Е.)
