Овие три деца и уште пет други, благодарение на акцијата на гостиварскиот Центар за социјални работи, сега за сега се тргнати од улица и поштедени од питање и од талкање. Акцијата е спроведена во рамките на проектот на Министерството за труд и социјала кој почна во септември, наречен „Деца од улица". Социјалните работници на терен ги барале децата, разговарале со нив и со нивните родители и успеале да ги убедат да се вклучат во образовниот процес. Повеќето од нив ги запишале во училиштето во Маврови Анови, каде што престојуваат во интернат со обезбедени храна, превоз и училишен прибор. 

Демир раскажува за своите први искуства во училишната клупа, и сега се фали со новите другарства. Ова црнооко дете прв пат се сретнало со книгите и училиштето и вели дека му е интересно и оти сака да научи да чита и да пишува.

Деновиве, со помош на тимот од Центарот за социјална работа Гостивар, стапивме во контакт со нив. Додека разговаравме, кај нив и нивната мајка Лејла впечатливо беше задоволството од исходот. Таа е благодарна за шансата за децата да не го живеат нејзиниот живот.

- Kога за викенди доаѓаат дома, гледам дека се поинакви, помирни. Kако нема да бидат кога се стоплени, нахранети. Тие не треба да живеат како мене во беда, неписмени - вели Ќамилова, која има уште две други деца.

Од Центарот велат дека во почетокот се соочиле со тешкотии, но набрзо работите тргнале на подобро.