Заврна снег во Македонија, прв поинтензивен оваа зима. Најмногу снег има во северните делови. Во Лазарополе има 10 сантиметри снег, во Маврово седум, а во Крушево два.

Во Скопје, Куманово, Крива Паланка и Тетово не се создаде снежна покривка.

Од Автомото сојузот на Македонија информираат дека на сите државни патишта во земјата сообраќајот се одвива без забрани.  Врнежи од дожд се забележани главно на пониските места, помешани со снег. Таму сообраќајот се одвива без проблеми.

Врнежи од послаб снег се забележани на повисоките планински места Попова Шапка, Стража, Маврово, Дебар, Крушево...

Единствено мали остатоци од кашест снег се забележуваат на патниот правец Крива Паланка кон ГП Деве Баир, но без забрани за сообраќај за возилата.

Од Автомото сојузот на Македонија препорачуваат возачите внимателно да ги управуваат возилата, бидејќи поради ваквите временски услови се забележува почетна појава на одрони на делниците кои минуваат низ клисурите и на повисоките планиски премини.

Уште една пречка во сообраќајот е појавата на магла, која ја намалува видливоста на планинскиот премин Плетвар. Видливоста е намалена од 50 до 100 метри. Се препорачува исклучително внимателно управување со возилата, прилагодена брзина на движење и да се одржува неопходното растојание меѓу возилата.

   (Дневник)

    25 јануари 2014