Министерот Попоски, амбасадорот Шчербак и претседателот Иванов на свечениот прием ДВАЕСЕТ ГОДИНИ ДИПЛОМАТСКИ ОДНОСИ Рускиот амбасадор оцени дека 20 години се многу краток, но значаен период во повеќевековната историја на двата народа и посочи оти Русија е една од првите земји што ја признаа Македонија под уставното име. Тој рече оти Русија е задоволна од успешниот развој на соработката во сите сфери.
- Оваа соработка се темели врз принципите на рамноправност, заемно почитување, доверба и на темелните норми на меѓународното право, односно на немешање во внатрешните работи, суверенитет и територијален интегритет - рече амбасадорот на приемот на кој присуствуваа и претседателот на Македонија, Ѓорге Иванов, поглаварот на Македонската православна црква, г.г. Стефан, како и други високи претставници од политичкиот, економскиот и од општествениот живот.
Шчербак истакна оти Русија е подготвена уште повеќе да го развива партнерство за доброто на двете земји и за зацврстување на мирот и на стабилноста во регионот.
- Сигурен сум дека нашите односи ги очекува прекрасна иднина - рече тој.
Шефот на македонската дипломатија, Попоски, пак, нагласи оти 31 јануари 1994 година е врежан датум во историјата на односите на две земји.
- На овој ден пред 20 години Руската Федерација истапи со безрезервна поддршка и ја призна Македонија под уставното име - рече Попоски.
Тој наведе оти Македонија и Русија потпишаа повеќе од 30 договори од различни области, потсети на деновите на македонска и на руска култура што се одржуваат во двете земји и нагласи оти лани е потпишана спогодба за отворање културноинформативни центри. Попоски оцени дека двете земји за 20 години значително ја зголемиле економската активност и нагласи дека во иднина треба уште повеќе да ја засилат соработката во стратегиските сфери, како економијата и туризмот.
- Треба да продолжиме да ја користиме економската дипломатија за привлекување руски инвестиции и за поголема промоција на македонските производители на рускиот пазар - рече Попоски и им се заблагодари на сите што секојдневно работат на промовирање на македонско-руските односи.
И весникот „Нова Македонија" учествува во промовирањето на односите меѓу двете земји со издавање на месечниот прилог „Руска реч", во соработка со московскиот весник „Росијскаја газета". | 