- Ги гледаа проектите. На Плаошник работата не е завршена. Можеби градбите делуваат како цели грамади затоа што сега на нив има само столбови и плочи, но сето тоа ќе се изѕида и ќе се вклопи во амбиентот. Ниту една од градбите нема да биде повисока од дозволеното, тврди директорката на Заводот и музеј Охрид Тања Паскали-Бунташеска.
Како што потврди таа, Комисијата на УНЕСКО се уште не доставила официјален извештај за теренската работа во Охрид, но дел од нивните забелешки можеле да се воочат уште за време на нивниот престој во Охрид.
- Покрај Плаошник, го разгледаа и старото градско јадро на Охрид и беа задоволни со тоа на кој начин ја вршиме конзервацијата на објектите на кои работиме. Беа воодушевени од документацијата која ја имаме за објектите од старото градско јадро. За жал беа разочарани од големиот број на колективни станбени згради кои се изградија во Охрид во последниве неколку години, појаснува Паскали Бунташеска.
Комисијата на УНЕСКО, според неа, не била во вонредна посета на Охрид, туку неа ја поканила министерката за култура на Република Македонија Елизабета Канческа-Милевска, а стручњаците од УНЕСКО претходно биле запознаени со сите активности што се случуваат на Плаошник преку извештајот што им го испратила Управата за заштита на културното наследство напишан на 90 страници.
А.Р.
