40 –тина гробови на православните верници во скопското село Брњарци се уништени од непознати сторители. Сликата со паднати и скршени спомен плочи ги вознемирила жителите кои утрината во чест на Задушница пристигнале да запалат свеќи. Знаеле дека претходно неколку постари гробови биле вандализирани, но се изненадиле кога забележале дека и новите споменици се уништени. Адетот го направиле – запалиле свеќи и оставиле цвеќе, но дома заминале, тврдат за Алфа, исплашени.
За првите уништени гробови, жителите пред неколку дена го известиле градоначалникот на Гази Баба – тој ги посетил заедно со ОБСЕ, но освен дека евентуално ќе помогне со малку пари, не можел да вети дека во иднина ќе се најде решение како гробиштата да бидат под постојана заштита.
Гробишата се на ридот над селото – до ридот се првите куќи на Арачиново. Брњарци има 120 куќи, над него е селото Страчинци. Жителите раскажуваат дека се живее мирно и дека имаат комуникација со соседите од другите села. Затоа не сакаат да веруваат дека некој имал намера со сквернавењето гробови да предизвика верска омраза и да поттикне револт, туку дека сепак, се вандали кои сакале да нанесат матерјална штета. Утрината жителите за настанот се јавиле во Достоинство. Стојанчо Ангелов во конфликтот бил ангажиран во овој регион.
Ако градоначалникот не им помогне брњарци самите ќе ги исправат спомен плочите и ќе бараат чаре како да ги заштитат.
(Алфа, Денешен Весник)
22 февруари 2014
