ВЕТЕРНИЦИТЕ ВО БОГДАНЦИ НАСКОРО ЌЕ ПРАВАТ СТРУЈА
Паркот на ветерни електрани „Богданци“ влегува во својата финална фаза од изградбата. На терен веќе се подигнати и целосно комплетирани сите 16 ветерници, а во тек се активностите за поврзување на ветерниот парк со електропреносната мрежа на МЕПСО.
Поради приклучување на паркот на ветерни електрани Богданци, во дистрибутивната мрежа вчера од 5 до 7 часот без електрична енергија беа населените места во општините Гевгелија, Валандово, Дојран и Богданци.
Сега следува период за тестирање на перформансите на комплетната техничка опрема, по што капацитетот ќе влезе во редовно производство. Целосно веќе е завршена изведбатата на потребната инфраструктура и придружни објекти за ветропаркот, изградена е патната инфраструктура, приклучени се далеководот, командната зграда и 20/110-киловолтната трафостаница. Останува да се реализира асфалтирањето на пристапниот пат и активностите за хортикултурно уредување на просторот околу ветерниците.
Ветерниот парк Богданци има 16 ветерни електрани распространети на 29 хектари и се очекува да испорачува најмалку 100 гигават-часови природно одржлива енергија, што на годишно ниво е доволно за снабдување на домаќинствата на 60.000 граѓани. Истовремено тие ќе ја зголемат инсталирана моќност на АД ЕЛЕМ за 36,8 мегавати, како и учеството на обновливите извори во нејзиното производството.
Во ветерниот парк се вградени турбини, производство на „Сименс-Данска“, кои се меѓу најдобрите во својата класа. Инсталираната моќност на секоја од нив е 2,3 мегавати, висината на столбот изнесува 84 метри, а дијаметарот на елисата е 93 метри.
Реализицијата на овој проект чини 55,5 милиони евра, од кои 47,9 милиони евра се заем од Владата на Сојузна Република Германија преку KФВ-банката, а 7,6 милиони евра обезбеди АД ЕЛЕМ од сопствени средства.
(Дневник)
22 март 2014