Ограбени четири цркви во Ресенско

Завчера, во полициската станица Ресен се пријавени две кражби кои се случиле во периодот од 21 до 22 март. Првата кражба се случила во црквата „Св. Никола“ во село Сопотско, каде непознат сторител со употреба на погоден алат и физичка сила влегол во црквата и одзел околу 900 денари и метален крст. 

Втората кражба е регистрирана во црквата „Богородица“ во село Крани, каде непознат сторител со употреба на погоден алат влегол во црквата и одзел сребрен крст, којшто тежел околу 400 грама, како и околу 2.700 денари.

Во периодот од саботата до неделата од викендот, во село Лева Река, Ресенско, непознат сторител со употреба на погоден алат извршил тешка кражба во црквата „Св. Никола“ од каде се одземени 500 денари. 

Вчера, пак, околу 16 часот, во ресенското село Кривени, непознат сторител со употреба на погоден алат извршил тешка кражба и во црквата „Св. Ѓорѓија“ од каде одзел 200 денари.

Во сите четири случаи извршен е увид и се преземаат мерки за откривање на сторителите. (МИА)

(Нова Македонија)

24 март 2014