Најбогатите 1 отсто до 2016-та ќе поседуваат над половина од светското богатство

Богатството на најбогатите еден отсто од светското население ќе го надмине во 2016 година она на преостанатите 99 проценти, пресмета пред одржувањето на неформалниот економски собир во Давос, британската непрофитна организација Oxfam.

„Димензиите на глобалната нееднаквост едноставно се запрепастувачки и покрај тоа што соодветните прашања стануваат се’ поважна тема во светските размери, јазот меѓу богатите и остатокот од светот остро се продлабочува“, изјави извршната директорка на Oxfam, Вини Бјанјима.

Уделот на најбогатите еден отсто од светското население во вкупното светско богатство надминало од 44 проценти во 2009 година на 48 отсто во 2014 година, се наведува во извештајот на споменатата организација објавен во понеделникот. До 2016 година уделот на најбогатите ќе надмине 50 отсто, пресметале нејзините експерти.

Од преостанатите 52 отсто од светското богатство во овој момент, речиси се’, односно дури 46 проценти, е во рацете на преостанатите 20 отсто од најбогатата светска популација. Со тоа другите 80 отсто од светското население останува со само 5,5 отсто од светското богатство, односно во просек со 3.851 американски долар по возрасно лице, се додава во извештајот.

Директорката на Oxfam, Бјанјима, воедно е и копретседателка на Светскиот економски форум чие редовно годишно заседавање во швајцарскиот град Давос започнува во среда и ќе трае до саботата. Пред собирот на светските челници и експерти во луксузниот швајцарски зимски центар, таа ги повика светските лидери да тргнат во битка против „прикриените интереси кои стојат на патот за изградба на поправеден и попросперитетен свет“.

Од Oxfam ги повикуваат државите да се справат со даночната евазија, да ги подобрат квалитетите на јавните услуги, да се фокусираат на оданочување на капиталот а не на трудот, како и да го воведат институтот на минималните плати за да осигурат поправедна дистрибуција на богатствата.

На годинешниот собир во Давос се очекува рекорден број учесници, вклучително и на повеќе од 300 шефови на држави и на влади, а се’ поизразената нееднаквост ќе биде меѓу главните теми на дебатите, заедно со глобалните кризи како што се терористичките закани во Европа и тензиите во односите со Русија./крај/мф/сн

http://makfax.com.mk/ekonomija/analiza/najbogatite-1-otsto-do-2016-ta-ke-poseduvaat-nad-polovina-od-svetskoto-bogatstvo

Извор: “Макфакс“