Треска е река во Македонија, десна притока на р. Вардар. Нејзината вкупна должина изнесува 132 km, а нејзиното сливно подрачје е со површина од 2.350 km². Друго име на оваа река е Голема Река, Велика Река или само Велика. Изворите на Треска се Еловечка Река, на источната страна на планината Стогово и Беличка Река од северните падини на Илинска Планина. Текот на Треска започнува кај селото Другово, Кичевско, кајшто се составуваат овие два крака. По својот тек низ кичевскиот крај реката се нарекува Голема Река, а низ Поречието - Велика Река. Треска се нарекува од селото Здуње кон Скопје. По течението од Здуње до Скопската котлина, во должина од 28 km, Треска тече низ стрм кањон во кој се наоѓа вештачкото езеро Козјак, формирано со браната изградена во 2005. година. На самиот влез во Скопската котлина, се наоѓа и вештачкото езеро Матка формирано со браната подигната во 1937. година. Треска се влева во Вардар во Ѓорче Петров крај Скопје. Кај Матка се наоѓаат и два манастири: Св. Андреја и Св. Никола Шишевски изградени во 14. век.
